គម្រោងអភិវឌ្ឍន៍ប្រព័ន្ធចម្រោះទឹកកខ្វក់ ក្រុងតាខ្មៅ ជំរុញបញ្ចប់នៅចុងឆ្នាំ ២០២៧
គម្រោងអភិវឌ្ឍន៍ប្រព័ន្ធចម្រោះទឹកកខ្វក់ក្រុងតាខ្មៅ គិតត្រឹមដំណាច់ខែធ្នូ ឆ្នាំ២០២៥ សម្រេចវឌ្ឍនភាពជារួមបានប្រមាណ ១៥,៥០%។ នេះបើតាមមន្រ្តីក្រសួងសាធារណការ និងដឹកជញ្ជូន។ គម្រោងអភិវឌ្ឍន៍ប្រព័ន្ធចម្រោះទឹកកខ្វក់នៅក្នុងក្រុងតាខ្មៅ រួមមាន៖ បណ្តាញលូទឹកកខ្វក់ប្រវែងសរុប ១២៥ គ.ម បណ្តាញលូទឹកភ្លៀងប្រវែងសរុប ៥,៣ គ.ម ស្ថានីយបូមទឹកកខ្វក់ធុនតូច-ធំចំនួន ០៧ កន្លែង និងការងារតំណភ្ជាប់តាមផ្ទះចំនួន ១០ ០០០ តំណ ស្ថិតក្នុងសង្កាត់កំពង់សំណាញ់ សង្កាត់តាក្តុល សង្កាត់តាខ្មៅ សង្កាត់ព្រែកហូរ និងសង្កាត់ព្រែកឫស្សី ព្រមទាំងស្ថានីយប្រព្រឹត្តកម្មទឹកកខ្វក់មានសមត្ថភាពចម្រោះ ១២ ០០០ ម៣/ថ្ងៃ ស្ថាបនាលើផ្ទៃដីទំហំ ២០ ហិកតា មានទីតាំង ស្ថិតនៅក្នុងភូមិសាស្ត្រភូមិព្រែកថី សង្កាត់រកាខ្ពស់ ក្រុងតាខ្មៅ ខេត្តកណ្តាល។ បន្ថែមលើទំហំការងារ គម្រោងបានទទួលគោលការណ៍សម្រាប់ការសិក្សាបច្ចេកទេសគំនូសប្លង់លម្អិតលើការងារកែលម្អស្ថានីយបូមទឹកភ្លៀង សាងសង់ស្ថានីយបូមថ្មី និងការតម្លើងបណ្តាញបង្ហូរទឹកភ្លៀង។ គម្រោងនេះចាប់ផ្តើមសាងសង់នៅថ្ងៃទី០១ ខែវិច្ឆិកា ឆ្នាំ២០២៤ ដែលមានរយៈពេលសាងសង់ ៣៦ ខែ គ្រោងបញ្ចប់នៅចុងឆ្នាំ ២០២៧៕
ក្រសួងសាធារណការ ចេញបណ្ណសម្គាល់យានជំនិះប្រភេទថ្មីបំពាក់បច្ចេកវិទ្យាទំនើប ទប់ស្កាត់ការក្លែងបន្លំ
ក្រសួងសាធារណការនិងដឹកជញ្ជូន បានប្រកាសដាក់ឱ្យប្រើប្រាស់បណ្ណសម្គាល់យានជំនិះប្រភេទថ្មីដែលត្រូវបានធ្វើទំនើបកម្មដោយបំពាក់នូវបច្ចេកវិទ្យាដើម្បីពង្រឹងគុណភាព ទប់ស្កាត់ការក្លែងបន្លំ ដែលបង្កឡើងដោយក្រុមបុគ្គលទុច្ចរិត។ បើតាមសេចក្តីជូនដំណឹងរបស់អគ្គនាយកដ្ឋានដឹកជញ្ជូនផ្លូវគោកនៃក្រសួងសាធារណការនិងដឹកជញ្ជូន បណ្ណសម្គាល់យានជំនិះប្រភេទថ្មីនេះ នឹងត្រូវដាក់ឱ្យប្រើប្រាស់ចាប់ពីថ្ងៃទី១៥ ខែមករា ឆ្នាំ២០២៦ នេះតទៅ៕
យោធាថៃចាប់ខ្លួនយុវជនខ្មែរម្នាក់ ចូលទៅយកឯកសារនៅក្នុងផ្ទះរបស់ខ្លួន ដែលថៃឈ្លានពាននៅតំបន់បឹងត្រកួន
ប៉ោយប៉ែត៖យោធាថៃបានឃាត់ខ្លួនយុវជនខ្មែរម្នាក់ ដែលចូលទៅក្នុងលំនៅដ្ឋានរបស់ខ្លួនក្នុងដែនដែលថៃបានឈ្លានពានដាក់កុងទីន័រ និងរាយបន្លាលួសហ៊ុំព័ទ្ធយកនៅតំបន់បឹងត្រកួនស្ថិតនៅក្នុងឃុំគោករមៀតស្រុកថ្មពួកខេត្តបន្ទាយមានជ័យ ក្រោយបទឈប់បាញ់នៃជម្លោះព្រំដែនកម្ពុជាថៃក្នុងអំឡុងខែធ្នូ ឆ្នាំ២០២៥។ យុវជនដែលយោធាថៃបានឃាត់ខ្លួនមានឈ្មោះ ផល ប៉ោង ហៅមាស ដាលីន ភេទប្រុស អាយុ២៩ឆ្នាំ រស់នៅភូមិបន្ទាយមានរិទ្ធ ឃុំគោករមៀត ស្រុកថ្មពួក ខេត្តបន្ទាយមានជ័យមានឪពុកឈ្មោះមាស ឡេង ត្រូវបានយោធាថៃចាប់បញ្ជូនទៅកាន់ខេត្តស្រះកែវប្រទេសថៃកាលពីម៉ោង ៨៖០០នាទីថ្ងៃ ទី១៣ ខែមករា ឆ្នាំ២០២៦ នៅចំណុចខាងត្បូងផ្សារបឹងត្រកួន ភូមិផ្លូវបំបែក ឃុំគោករមៀត។តាមបុរស ឈ្មោះ មាស ឡេង ត្រូវជាឪពុកបានឱ្យដឹងថា មុនពេលកើតហេតុរូបគាត់បានដឹកកូនតាមម៉ូតូទៅឈប់ត្រង់រង្វង់មូលផ្លូវចូលច្រកតំបន់បឹងត្រកួន ឱ្យកូនចុះដើរចូលទៅផ្ទះយកឯកសារដោយរូបគាត់មិនហានចូលដោយចាំយូរពេកទើបដឹងថា កូនត្រូវយោធាថៃចាប់។
អ្នកនាំពាក្យក្រសួងការងារ អំពាវនាវដល់កម្មករ-និយោជិតទាំងអស់ ទាក់ទងលេខ ១២៨៦ ក្នុងករណីមានបញ្ហាដើម្បីឱ្យក្រសួងអន្តរាគមន៍បានលឿនរហ័សជូនបងប្អូន
ដើម្បីដោះស្រាយបញ្ហាប្រឈមជូនបងប្អូនកម្មករ-និយោជិតទាំងអស់ ឱ្យបានលឿនរហ័ស និងមានប្រសិទ្ធភាពនោះ អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានអំពាវនាវដល់បងប្អូនទាក់ទងមកលេខ ១២៨៦ ដែលជាលេខ Hotline របស់ក្រសួង។ លោក ស៊ុន មេសា អ្នកនាំពាក្យក្រសួងការងារ មានប្រសាសន៍នៅថ្ងៃទី១៤ ខែមករា នេះថា «នៅពេលបងប្អូនកម្មករ-និយោជិត មានបញ្ហាទាក់ទងនឹងលក្ខខណ្ឌការងារច្បាប់ការងារ ការរំលោភសិទ្ធិ ឬការជេរប្រមាថណាមួយនោះ សូមបងប្អូនទាក់ទងមកក្រសួងការងារ តាមរយៈលេខ Hotline ១២៨៦ ដែលធ្វើការ ២៤ម៉ោងក្នុងមួយថ្ងៃ និង៧ថ្ងៃក្នុងមួយសប្ដាហ៍»។
អង្គការមូលនិធិប្រាសាទពិភពលោកបន្តគម្រោងជួសជុលប្រាសាទភ្នំបាខែង
អង្គការមូលនិធិប្រាសាទពិភពលោក ឬ Wold Monuments Fund ហៅកាត់ថា WMF កំពុងបន្តកិច្ចសហការជាមួយអាជ្ញាធរជាតិអប្សរា ដើម្បីជួសជុលជ្រុងខាងលិចប្រាសាទភ្នំបាខែង ដោយរំពឹងថានឹងបញ្ចប់គម្រោងទាំងស្រុងនៅក្នុងឆ្នាំ២០២៩។ លោក ជីវ ភិរម្យ ប្រធានបច្ចេកទេសគម្រោងជួសជុលប្រាសាទភ្នំបាខែង នៃអង្គការ WMF បានឱ្យដឹងថា គម្រោងជួសជុលជ្រុងខាងលិច បានចាប់ផ្តើមដំណើរការពីឆ្នាំ២០២៦ ហើយគ្រោងនឹងបញ្ចប់នៅក្នុងឆ្នាំ ២០២៩។ លោកបានពន្យល់ថា ក្រុមការងារបានជួសជុលផ្នែកកម្រាលនៅតាមជាន់ទាំងបួន ដែលតាងដោយអក្សរ F (ជាន់ក្រោម) និងរហូតដល់អក្សរ C ដែលជាជាន់ទីបួន។ នេះជាដំណាក់កាលទី៣ នៃគម្រោងជួសជុលប្រាសាទភ្នំបាខែង ខណៈដែលអង្គការ WMF បានចូលខ្លួនចូលរួមអភិរក្សប្រាសាទនេះតាំងពីឆ្នាំ២០០៤មក។ ចាប់ពីឆ្នាំ២០០៤ ដល់ឆ្នាំ ២០០៧ WMF បានចូលមកសិក្សាស្រាវជ្រាវ និងធ្វើគម្រោងជួសជុលសាកល្បង នៅជាន់F ជ្រុងខាងត្បូងឈៀងខាងលិច។ ដំណាក់កាលទី២ ពីឆ្នាំ២០០៨ និងបញ្ចប់នៅឆ្នាំ២០១៩ ដោយបានជួសជុលចាប់ពីពាក់កណ្តាលជណ្តើរខាងជើង និងខាងត្បូងទៅជ្រុងខាងកើត ហើយក្នុងគម្រោងនោះ ក៏បានធ្វើកំណាយ រួមនឹងការអភិរក្សមួយចំនួនផង។ រីឯដំណាក់កាលទី៣ ចាប់ពីខែ សីហា ឆ្នាំ២០១៩ រហូតដល់ឆ្នាំ២០២៩។